Infocenter - La bursa d'elecziuns
Tge è in martgà da prognosas?
L'onn 1945 ha formulà il purtader dal premi Nobel, l'Austriac Friedrich August von Hayek, la tesa ch'ils pretschs - sa sviluppads tras la dumonda e l'offerta - sajan indicaturs per infurmaziuns derasadas. In exempel prototipic per quai èn ils curs da las aczias: quels illustreschan cun lur svilups magari rasants adina puspè quant sensibel ch'ils pretschs reageschan sin las infurmaziuns dal martgà derasadas.
Ils martgads da prognosas sa servan da quest princip: els rimnan infurmaziuns derasadas e fan uschia, a basa da la savida da blers, prognosas vaira exactas. Cun questa metoda èsi pussaivel da prognostitgar svilups politics actuals, sco era las cifras distinctivas relevantas d'interpresas e tendenzas da svilup significativas.
En retschertgas d'opiniun classicas contactescha in institut activamain persunas elegidas e las dumonda lur opiniun persunala (p.ex. l'intenziun da votar). A maun da questas "datas bruttas" fa l'institut alura la prognosa. Tut auter funcziunan ils martgads da prognosas: qua decidan exclusivamain las persunas participadas ils curs da las aczias e qua tras la prognosa. L'organisatur n'influenzescha betg la furmaziun dals pretschs. Als martgads da prognosas è decisiva la "intelligenza collectiva" dals participants per survegnir ina prognosa precisa d'eveniments.
Martgads da prognosas politics
En ils martgads da prognosas politics vegnan las partidas u las persunas che candideschan visualisadas sco aczias. Ils curs d'aczias da mintga partida reflecteschan las spetgas dals giugaders areguard il resultat da l'elecziun. Cun ses curs d'aczias metta il martgà da prognosas uschia a disposiziun cuntinuadamain ed a temp real las prognosas davart in eveniment.
Participaziun
Mintga participant survegn a l'entschatta in dumber fix d'aczias ed ina summa da daners virtuala ch'al pussibilitescha da martgadar. La finamira dal gieu è da maximar l'atgna facultad cun agid da bunas prognosas e speculaziuns raffinadas. A la fin dal gieu cumpra la banca enavos tut las vaglias per il pretsch che sa resulta a la fin uffiziala da l'eveniment prognostitgà (p.ex. resultat uffizial da l'elecziun).
Prendai part ed As annunziai qua.
Ina curta instrucziun per cumenzar immediat chattais Vus qua.
Ils Tips e trics gidan Vus a martgadar e cuntegnan indicaziuns utilas davart la strategia a la bursa da prognosas.
En l'ABC da la bursa da prognosas chattais Vus explicaziuns davart noziuns frequentas.
Istorgia
L'emprim martgà da prognosas è vegnì realisà il 1988 en ils Stadis Unids da l'America. Quel ha prognostitgà il resultat da l'elecziun presidenziala diesch giadas pli exactamain che tut las retschertgas. Dapi lura han ins organisà en numerus pajais talas bursas da prognosas. En l'Austria èn vegnidas realisadas dapi il 1994 bursas d'elecziuns per mintga votaziun pli gronda. L'interess per quellas è s'augmentà fermamain ils ultims onns.
Martgà da prognosas da pro:kons
Quest martgà da prognosas sa basa sin il modul da prognosas da pro:kons, in product da l'agentura BDF-net für neue Medien GmbH. Il num pro:kons stat per PROgnosa e CONnsens. pro:kons porscha, sper in modul da software per bursas da prognosas, era in modul che sustegna a moda efficazia organisaziuns a chattar in consens. Dapli davart pro:kons chattais Vus sin www.prokons.com.
